Интервју со Надица Бунеска

Интервју со новоизбраниот претседател на младинската заедница

Надица Бунеска - Претседател на Младинската заедница на Гимназијата На ден 17.12.2014 година се одржаа изборите за нов претседател на Младинската заедница на кои беа пријавени вкупно 7 ученици од III година. За нов претседател учениците од нашата Гимназија ја избраа Надица Бунеска ученичка во III³ клас. За потпретседател беше избран Илчо Лешникоски од III⁶клас, а за секретар беше избрана Ангела Икономоска од III⁶ клас.

Имавме можност да го направиме следното интервју со новоизбраниот Претседател на младинската заедница Надица.

- Која беше твојата мотивација за да се пријавиш за претседател на младинската заедница?

Мојата мотивација за да се пријавам за Претседател на Младинската заедница, пред се, беше желбата за да се докажам во моите способности, желбата за да ја доведам нашата Гимназија на уште повисоко ниво од она на кое што е сега, како и се разбира, мојот класен раководител, професорот Тони Атанасоски, кој постојано ме бодреше дека можам да успеам во својата замисла.

- Дали имаше трема за време на претставувањето на годишниот план и дали се плашеше од конкуренцијата?

Па... се разбира дека тремата беше присутна, но не дозволив да ме совлада и мислам дека настапив доста самоуверено во претставувањето на мојата програма, а за конкуренцијата би кажала дека навистина беше неизвесно на почетокот, но откако сите се претставија со своите говори, веќе почнавме да се издвојуваме оние неколку ученици кои сме сега претставници на младинската заедница.

- Дали очекуваше дека учениците ќе те изберат тебе?

Искрено, тргнав со помислата: “Што биде, нека бидe”, бидејќи не сакав доколку не ме изберат мене, на крајот да бидам разочарана. Но секако дека постоеше она мало жарче надеж во секој од нас и нормално дека секој посакуваше да биде избран. Но ете, среќата ми се насмевна мене. Сепак мислам дека најмногу влијаеше начинот на пристап кон учениците и со колкава самодоверба ја презентиравме програмата.

- Кои активности и идеи се во план да се исполнат во текот на наредната година?

Во текот на наредната година во мојата програма имам околу 20 активности, кои покрај оние активности кои се одржуваат традиционално секоја година, сакам да ја разбијат монотонијата, постојано да се случува нешто ново во Гимназијата. Некои од позначајните се следните:

Збратимување со други училишта од други градови во државава, па дури и надвор од неа, секако доколку имаме можност.
Избор на професор / ученик на месецот
Формирање на клуб за медијација
Формирање на клуб за талентирани ученици и помош на послаби ученици
Организирање на училишно добредојде на новите гимназијалци
Ориентација на новите гимназијалци
Посета на деца во болница кои се опоравуваат од некаква болест или повреда
Есеистички ден – избор на најдобар есеј од учениците
Овозможување на стипендија за матурантите
Предавање за идни крводарители
Избор на најдобро изработена реклама за гимназијата од страна на учениците
Училишни работилници за учениците – артисти, кои сите постери за идните настани ќе ги изработуваат со цртање

Освен овие активности и сите други кои се дел од мојата програма, сигурна сум дека ќе има и уште многу други кои јас, како претседател, со задоволство ќе ги исполнам.

- Што би кажала за крај?

За крај сакам да им порачам на сите гимназијалци да ги споделат своите идеи, а јас ќе им помогнам во нивното реализирање.

-Ти благодариме за одвоеното време за интервјуто и ти посакуваме успешна реализација на плановите.

И јас ви благодарам на вниманието.

(Интервјуто со Надица Бунеска го водеа
Наташа Ристеска III⁷ клас и Елена Ѓорѓиовска III¹ клас)

20.12.2014 година