ПОЛИТИКАТА, КАКО ИДНА ПРОФЕСИЈА
Нашата ученичка Верица Попоска, во почетокот на ноември годинава, престојуваше во Стразбур, Франција, на Светскиот форум за демократија. За нејзините активности и впечатоци, направивме кратко интервју со неа.
1. Како дозна за настанот?
- За настанот дознав преку интернет, како што и течеше цела апликација која вклучуваше CV, мотивационо писмо, видео одговори на прашања, интервју и од месец Август работевме активно на онлајн платформа.
2. Која беше целта на настанот и каква беше организацијата?
- Настанот вклучуваше 230 млади од цел свет, делегати од секоја земја. Од Македонија бевме 5. Светскиот форум за демократија е годишен собир на лидери, креатори на јавното мислење, активисти на граѓанското општество, претставници на бизнисот, академските институции, медиумите и професионалните групи за да дебатираат за клучни предизвици за демократиите во светот. Бидејќи Советот на Европа за прв пат реши да му посвети целосно внимание на младите, всушност ние бевме главната тема (Колку младите се вклучени во парламентот, од кога младите треба да почнат со гласање, колку и како се вклучуваат во политиката и колку имаат критичко мислење).
3. Како ги поминувавте деновите, каде и што работевте и кои беа вашите цели?
- Работевме во лабаратории и прототипи првенствено во Младинскиот Совет на Европа и потоа во самиот Совет на Европа каде се одржуваат заседанијата што за мене беше големо искуство. Мојата лабараторија гласеше „Разбирање на демократијата“ предводена од Г-дин Jean-Marie Heydt, претседател на Конференцијата на меѓународни невладини организации на Советот на Европа. Имавме за цел да ја доближеме на наједноставен начин демократијата до најмладите и за таа цел се креира Android, iOS игра „SIM Democracy“ под менторство на Г-дин Rainer Adam, регионален директор од Германија, која е интерактивна едукативна алатка и симулира една демократска заедница. Ви препорачувам да ја симните и пробате.
4. Какви се твоите впечатоци?
- Секако после соработките со успешни лица меѓу кои Harlem Désir (министер за европски прашања -Франција) и Thorbjоrn Jagland (Генерален секретар на Советот на Европа) сеуште сум под големи импресии. Ме фасцинира нивната едноставност и се разбира еден ден сакам да бидам дел од тој круг.
5. На какви студии би сакала да продолжиш во иднина и во која држава?
- Студиите сакам да ги продолжам на политички или правни науки, во некоја од земјите на Европската Унија, но имам желба повторно да се вратам во Македонија бидејќи чувствувам голема одговорност за мојата земја.
Ти благодарам за одвоеното време за интервјуто и ти посакувам да ти се исполнат желбите.
И јас ти благодарам на посветеното внимание.
(Интервјуто со Верица го водеше Бисера Мицеска III-1 клас)
22.11.2014 год
- Календар на неработни денови во 2017 година
- Заштита на личните податоци