Гимназија „Мирче Ацев“ Прилеп

Гимназијалецот Петар Мирчевски ќе се натпреварува на две светски хемиски олимпијади

   После успешниот циклус на натпревари по предметот хемија (oпштински, регионален и државен натпревар) и освоена прва награда на државниот натпревар, ученикот Петар Мирчевски од СОУ Гимназија „Мирче Ацев“ - Прилеп, под менторство на проф.Блаже Димески продолжи да учествува на подготовки за олимпијада по хемија.

   „Ова е неверојатен успех на Петар  или подобро кажано подвиг, затоа што за кратко време го совлада редовниот материјал од II, III и IV година и на 26 јануари 2023 година, во првиот селекционен натпревар се пласира меѓу десетте најдобри ученици.“

Петар Мирчевски и менторот Блаже Димески на прием кај в.д. Директорот Весна Михаиловска

   „Со тоа се стекна со правото да продолжи со подготовки на Природно-математичкиот факултет при Институтот на хемија, кои се состоеа од предавања и изведување експерименти прилагодени на материјалот предвиден за олимпијадите. Мора да се каже дека материјалот што треба да се совлада за влез во Олимпискиот тим е скоро цела теориска и применета хемија а се изучува од светски најпознатите автори, истите оние  кои  се учат и на најреномираните универзитети.“ - објасни неговиот ментор, професорот Блаже Димески. 

   На Вториот Селекционен натпревар, одржан на 8 и 9 април, Петар Мирчевски го освои второто место и стана дел од тимот кој што ќе ја претставува Македонија на Интернационалната Менделеева Хемиска Олимпијада (IMChO 2023) во Астана, Казахстан од 30-ти април до 6-ти мај.

   По враќањето на македонскиот тим од споменатата олимпијада, со организаторот на тимот професор Д-р Миха Буклески, следат повторно кратки подготовки за Интернационалната Хемиска Олимпијада (IChO 2023) која ќе се одржи на лето во Цирих, Швајцарија.

   Најдобро е што тој е млад хемичар кој ќе има шанса и следните години да се натпреварува  и да биде се подобар и подобар. Исто така, со самото учество на овие натпревари ќе му бидат отворени вратите на сите светски  универзитети.

   Да му посакаме се најдобро и многу успех и  да ни ја претстави Гимназијата, Прилеп и Македонија во најдобро светло!

Ученикот и менторот заслужуваат едно големо БРАВО за овој несекојдневен успех !