Гимназија „Мирче Ацев“ Прилеп

  Минатата наставна година, 2017/2018, од Фондот за иновации и технолошки развој на РМ беше објавен конкурсот „Предизвик на млади истражувачи“ на кој аплицираше и тим на ученици и професори од СОУ Гимназија „МИРЧЕ АЦЕВ“ - Прилеп, со свој проект кој се однесуваше на процентот на загадување на воздухот во Прилеп и околината. Во проектот со наслов „Вертикален воздушен тунел“, учествуваа учениците Ебру Мифтароска од IV година, Наум Апостолоски и Антонио Мијајлески од II год. и Александар Петрески од прва година под менторство на професорите по хемија Блаже Димески и Ружа Ангелеска. Учесниците во проектот објаснуваат:
   „Поттикнати од медиумското атакување дека Скопје, Тетово и Битола се најзагадените градови во светот со честички од 2,5 и 10 п.м. размислувавме какво е загадувањето на локално ниво, затоа што според информациите кои се објавуваат по медиумите и од Заводот за здравствена заштита сè поголем е бројот на респираторни заболувања, карциноми и слично.
   Со апликацијата за проектот ги исполнивме сите критериуми и воедно влеговме во финале на најдобрите 18 проекти во државава, а целта нѝ беше да направиме промоција и запознавање на пошироката јавност со загадувањето на животната средина и потенцијалните проблеми на локално ниво кои произлегуваат од тоа.
   Со мерењето на 5 локации на локално ниво и во една од руралните средини, селото  Дебреште, од каде доаѓаше и ученичката Ебру Мифтароска, докажавме дека загадувањето на локално ниво е три пати поголемо од дозволеното, а со тоа дека и Прилеп e еден од најзагадените градови во светот.
   Пораката е ЈАСНА! Најитно преземање на мерки на превенција и заштита од најголемите загадувачи, а со тоа и заштита на животната средина, здравјето и животот на граѓаните“

Благодарност до ТВ Канал Визија што нѝ го позајми снимениот материјал, со што нѝ овозможи да ја запознаеме пошироката јавност со сериозниот проблем на загадувањето.