Гимназија „Мирче Ацев“ Прилеп

Поезија од душата

   Кога љубовта е главната водилка на срцето, од душата секогаш се излеваат зборови кои се полни со емоции и страст...
Христина Ангелеска предводена од љубовта на 04.02.2016 година ја промовираше својата прва збирка поезија „Стравови“ во киното  „Мис Стон“. На промоцијата присуствуваа ученици, професори, пријатели и љубители на убавиот збор, а во реализацијата на промоцијата беше вклучен тим на ученици од нашето училиште.

   Следува интервју со Христина

• Која беше инспирацијта за да ја напишеш  книгата?

Инспирација за поезијата која ја создавам е љубовта и реалноста, а за објавување на книга мотивација беше да се создаде еден уметнички чин со кој ќе се овенча нашата љубов.

• Каква тематика имаат песните ?

Песните имаат романтичарски, надреалистички и реалистичен бран.

• Кога се роди љубовта кон поезијата?

Љубовта кон поезијата сум ја имала отсекогаш, а интезивно почнав со пишување и читање на 15-16 години.

• Дали е ова твоја прва книга?

Ова ми е прва книга, а за промоцијата сметам дека беше уметнички акт со фантастичен тим на талентирани млади луѓе.

• Колку време се спремавте за промоцијата ?

За промоцијата се спремавме околу 20 дена, идејата за настанот ја имав во глава од поодамна но не мислев дека навистина ќе ја реализирам.

• Што би им препорачала на оние кои ја сакаат поезијата и читаат?

На оние кои ја сакаат поезијата би им препорачала да читаат, читаат, читаат! Да ги заборават осетите за она што е евидентно и да влезат зад границите на искуството. А за тие што сакаат да објават книга немам никаков империјалистички совет. Славете ја поезијата во вашите интимни кругови, таму најмногу ја има уметноста.

• Ти благодарам и ти посакувам многу успеси во иднина.

Благодарам и јас.

Интервју: Елена Ѓорѓиовска